Fiansa
Bo tin ku hasi un kompra grandi, anto bo tin mester di un suma grandi? Komo miembro di ACU bo ta bini na remarke pa un fiansa. ACU ta ofresé diferente tipo di fiansa, manera e fiansa komun ku un término di pago bèk di entre 12 pa 96 luna, fiansa pa kompra di un outo nobo òf segunda mano òf estudio profeshonal. Pa un bista kompleto di e diferente tiponan di fiansa, mira e Polítika di Fiansa.
Kondishonnan pa bini na remarke pa un fiansa:
Pa bo por bini na remarke pa un fiansa komo sosio di ACU, bo mester kumpli ku por lo ménos 1 di e siguiente kondishonnan:
- Si bo ta un sosio eksistente i bo no a kumpli ku e deber mensual di spar riba bo akshon, bo ta dispuesto pa spar e periodonan ku falta na akshon pa risibí un fiansa;
- Si bo ta un sosio nobo, bo ta dispuesto pa kompromete bo mes pa spar riba bo akshon pa risibí un fiansa.
E polítika di fiansa
E komishon di krédito i den sierto kaso e ‘Loan Officer’, ta disidí tokante di petishonnan pa fiansa a base di e Polítika di Fiansa ku huntuku Direktiva i e Komishon di Krédito a stipulá. Kondishonnan pa miembronan haña un fiansa ta stipulá den e Polítika di Fiansa.E ofisina ta palabrá ku bo ki dia bo por tende resultado di bo petishon pa un fiansa.
Prosedimentu i formulario di petishon
Pa hasi petishon pa fiansa bo por yena e Formulario pa petishon pa fiansa na ofisina ku asistensia di e Departamentu di Fiansa di Djaluna pa Djabièrnè entre 8:00 a.m. i 2:00 p.m. Tambe ta posibel pa apliká pa bo fiansa via di internet hasiendo uso di e servisio di ACU E-Loan.
Ta rekerí e siguiente dokumentonan:
Identifikashon bálido (sédula, reibeweis òf pasport)
3 último slepnan di salario, penshun òf otro tipo di entrada regular a base di kontrato
3 último estado di kuenta (‘statement’) di banko
Deklarashon di trabou di e sosio dirigí na ACU. E deklarashon di trabou no por ta mas bieu ku un (1) luna riba fecha di entrega di petishon di fiansa.
Karta(nan) di saldo di otro debe(nan).
“Car order” òf karchi di kùr (den kaso ku ta un fiansa pa outo)
Dependé di e tipo i montante di fiansa, kisas mester di mas dokumento, manera Karta di saldo di debe.
Kuantu bo por fia
Komo sosio di ACU en prinsipio bo porfia un suma máksimo di entre 10 bes pa 20 bes e saldo di bo akshon. E suma di e fiansa ta keda determiná pa:
- Haltura di bo saldo di akshon;
- Bo antesedentenan (entre otro, komportashon pa ku pago), manera a keda fihá den bo file;
- Bo sueldo brutu pa luna;
- E sobrá reglanan di e Polítika di Fiansa;
- E montante ku bo ta pagando kaba riba otro posibel fiansanan.
Pago di fiansa
Na entrega di e fiansa ta pidí bo pa yena un outorisashon pa retenshon di e pago bèk for di bo salario. Di e manera aki tur luna bo ta paga un parti di bo fiansa bèk outomátikamente.